پانی دودھیا، مٹیالہ اور ثمر نالہ – پربت کے دامن میں

Posted: 15 Jul 2012 04:34 PM PDT

بسم اللہ الرحمن الرحیم

گذشتہ سے پیوستہ

دو پانیوں کا خوبصورت ملاپ

ہمیں سفر کرتے ہوئے تقریباً بارہ تیرہ گھنٹے گذر چکے تھے اور اب ہم سفر سے تھوڑے تھوڑے اکتا رہے تھے۔ مگر دائیں طرف موجود دریائے سندھ اور اس کے کنارے کنارے بل کھاتی قراقرم ہائی وے پر سفر کا بھی اپنا ہی مزہ تھا۔ تھوڑا سا سفر کرتے تو کوئی نہ کوئی چشمہ، ندی یا نالہ دریائے سندھ میں گِر رہا ہوتا۔ جہاں پر دو پانیوں کا ملاپ ہوتا وہ منظر بہت ہی خوبصورت ہوتا۔ دودھیا اور مٹیالہ پانی گلے مل رہے ہوتے۔ چشمے، ندی یا نالے کا پانی تھا تو شفاف مگر زیادہ ڈھلوان کی وجہ سے پتھروں سے ٹکراتا، چھینٹے اڑاتا، بلبلے بناتا، دودھیا رنگت کا جھانسہ دیتے ہوئے دریا میں گِرتا۔ شاید دریائے سندھ دوسرے پانیوں کی رنگت سے متاثر ہو کر انہیں اپنے ساتھ ملا رہا تھا یا پھر یہ اس کا بڑا پن تھا، اب نیت تو اللہ ہی بہتر جانتا ہے۔ بہر حال جو بھی تھا، میں نے تو یہی دیکھا کہ دریابڑی گرمجوشی سے اپنے دونوں بازو کھولتا اور چشموں کو اپنی آغوش میں لے لیتا۔ چشمے بھی ہنسی خوشی دریا کی آغوش میں سما جاتے۔ ایسا لگ رہا تھا جیسے چشمے صدیوں سے دریا کی جدائی میں تھے اور انہیں ابھی ابھی دریا سے ملنے کا موقع ملا اور وہ اچھلتے، ناچتے، گاتے دریا سے ملنے اور اس کے مٹیالے پانی میں فنا ہونے کو دوڑے چلے آ رہے ہیں۔ دو مختلف رنگ، نسل اور قبیلے کے پانیوں کو ملتا دیکھ کر میں سوچ میں ڈوب گیا کہ ہم انسان ان پانیوں کی مانند کیوں نہیں ہوتے۔ ہم رنگ، نسل اور قبیلے کی تفریق میں کیوں پڑے ہیں؟ یا پھر یہ پانی ہیں اور ہم انسان ہیں۔ ان پانیوں کے مزاج میں بغض، کینہ اور حسد نہیں۔ اگر یہ بھی انسانوں کی طرح ہوتے تو شاید کبھی ایک دوسرے سے نہ ملتے بلکہ ہر کوئی دھرتی کی میخوں (پہاڑوں) کو اکھاڑ کر اپنا اپنا الگ رستہ بناتا، یوں انسانوں کی طرح دھرتی کا حسن برباد کرتے اور خود کو خسارہ میں ڈالتے۔

ایک طرف دو قسم کے پانی آپس میں مل رہے تھے تو دوسری طرف دن بھی رات کو ملنے کے لئے بیتاب تھا۔ شام ہو رہی تھی اور ہمارا سفر جاری تھا۔ شاہراہ قراقرم بلندی سے نیچے آ گئی یا پھر یہاں پر دریائے سندھ ہی بلند ہو گیا۔ بہر حال جو بھی تھا مگر دریا سڑک کے کافی قریب تھا۔ میرے موبائل کا جی پی ایس سسٹم بتا رہا تھا کہ داسو شہر آنے والا ہے۔ گاڑی میں چہ مگوئیاں شروع ہو گئیں۔ سب کا خیال تھا کہ اب سورج ڈھل چکا ہے اور سفر کرتے ہوئے بھی چودہ گھنٹے ہو چکے ہیں لہٰذا ثمر نالہ کی بجائے داسو میں ہی رات گزاری جائے۔ مگر میرا ذرہ بھی دل نہیں تھا کہ ہم داسو میں رات رہیں۔ میرا مشورہ یہی تھا کہ سفر جاری رکھا جائے اور ثمر نالہ تک پہنچا جائے۔ داسو میں ہم نے ایک دفعہ پھر دریائے سندھ کو عبور کیا اور اب دریائے ہماری بائیں جانب سے نمودار ہو گیا۔

گاڑی رکوا لی گئی اور داسو میں رات رہنے کی بات چیت شروع ہو گئی۔ وہاں پر کیمپنگ کی کوئی مناسب جگہ نہیں تھی لہٰذا سلیم نے ہوٹلوں کے متعلق معلومات حاصل کرنا شروع کر دی۔ وہیں پر ایک ہوٹل کے باہر ایک پولیس والے سے ملاقات ہوئی اور سلیم نے اس سے پوچھا کہ ہم ثمرنالہ تک جانا چاہتے ہیں کیا راستے میں ڈاکو وغیرہ کا کوئی خطرہ تو نہیں، اگر خطرہ ہے تو ہم یہیں پر رات گزار لیتے ہیں۔ وہ کیا ہے کہ ہمارا ایک دوست اپنی کمپنی کی طرف سے آج کل ہنزہ میں ہے، اس نے سپیشل فون کر کے سختی سے رات کے وقت شاہراہ قراقرم پر سفر کرنے سے منع کیا تھا۔ خیر پولیس والے نے سلیم کو جواب دیا کہ ثمر نالہ تک تو کوئی مسئلہ نہیں مگر اس سے آگے رات کے وقت سفر نہ کرنا اور ساتھ ہی کہا کہ یہاں داسو میں رات کو بھی گرمی ہو گی اور ساتھ ساتھ مچھر بھی ہو گا اور بجلی بھی جائے گی، اس لئے بہتر ہے کہ آپ ثمر نالہ ہی چلے جاؤ، ایک تو وہاں پر موسم بڑا خوشگوار ہو گا اور دوسرا وہاں پر بجلی بند نہیں ہوتی۔ ویسے میرے علاوہ سب دوستوں کا داسو میں ہی رہنے کا دل تھا مگر پولیس والے کی بات سن کر انہوں نے بھی ثمرنالہ جانے کا پروگرام بنا لیا، یوں چودہ گھنٹے سفر کرنے کے بعد بھی مزید سفر کے لئے گاڑی چل پڑی۔

ثمر نالہ

رات ہو چکی تھی۔ ہمیں صرف سڑک ہی نظر آ رہی تھی۔ ہر طرف ویرانہ تھا۔ دن کے وقت جس دریا کی آواز سریلی لگ رہی تھی ابھی وہی آواز سانپ کی پھنکار جیسی معلوم ہونے لگی۔ سارا کھیل نفسیات کا ہے، کب رائی کا پہاڑ بن جائے کچھ پتہ ہی نہیں چلتا۔ ثمر نالہ پہنچنے سے پہلے دوسری طرف سے آتے ہوئے ایک دو قافلے ملے۔ دراصل آج کل حالات کی وجہ سے شاہراہ قراقرم پر رات کو ٹریفک قافلوں کی صورت میں چلتی ہے۔ اس کے بعد ویرانہ تو جیسے ہماری جان لینے کے در پے تھا۔ موسم بھی خراب ہونا شروع ہو گیا۔ بادل گرجنے لگے اور ایک دو دفعہ بارش کی ہلکی سی پھوار بھی آئی۔ سونے پر سہاگہ کہ داسو سے آگے سڑک بھی ٹوٹی ہوئی تھی اور ثمر نالہ تھا کہ آنے کا نام ہی نہیں لے رہا تھا۔

ثمر نالہ پر پُل

دو گھنٹے کی مسافت کے بعد اللہ اللہ کر کے تقریباً رات نو بجے ثمرنالہ یک دم نمودار ہو گیا۔ ابھی ایک لمحہ پہلے دور دور تک ثمر نالہ کے کوئی آثار نہیں تھے لیکن ایک چھوٹے سے موڑ کے بعد یک دم ہی پہاڑوں سے نکل کر سڑک پر آ گیا۔ ثمر نالہ نہ ہوا کوئی جن ہو گیا۔ سب نے سکون کا سانس لیا اور گاڑی سے اترے۔ ثمرنالہ میں کوئی آبادی نہیں بس ایک دو چھوٹے چھوٹے ہوٹل ہیں۔ ادھر سے جاتے ہوئے بائیں طرف دریائے سندھ ہے اور پہاڑوں سے بہتا ہوا ایک نالہ دریا میں گرتا ہے۔ یہ جگہ پہاڑوں کے دامن میں تھی اور ہوا کچھ اس طرح چل رہی تھی کہ وہ نالے کے ٹھنڈے پانی سے ٹکرا کر ہم تک پہنچتی۔ ایسا لگ رہا تھا کہ قدرت نے کئی لاکھ ٹنوں کا اے سی چلا رکھا ہے۔ ویسے مزے کے کی بات ہے کہ ثمر نالہ سے تقریباً سو میٹر پیچھے اور آگے موڑ ہیں اور موڑ کی اس طرف گرمی ہے۔ گرمی کے اس تندور میں ثمر نالہ ایک چھوٹی سی پرسکون جگہ ہے۔ نالے کے پانی کی تیز رفتاری کی وجہ سے آواز اتنی تھی کہ ایک دوسرے سے باتیں کرنے کے لئے کافی اونچا بولنا پڑتا۔

چار درویش ثمر نالہ میں مٹر گشت کرتے ہوئے

خیر سلیم نے ہوٹل میں کمرے کا بندوبست کیا۔ ہم نے ضروری سامان کمرے میں رکھا۔ روٹیاں ہوٹل سے لیں اور سالن وہی نکالا جو گھر سے پکوا کر فریز کر کے لے گئے تھے۔ کھانا کھایا، کمرے میں پہنچے اور بیڈ پر بیٹھے کب نیند آئی کچھ پتہ ہی نہیں چلا۔ ساری رات ایک لمحہ کے لئے بھی ہوش نہ آیا وہ کیا ہے کہ پندرہ سولہ گھنٹے سفر جو کیا تھا۔ صبح اٹھا تو دیکھا کہ کمرے میں تو صرف میں، عباس اور سلیم ہی سو رہے تھے، باقیوں کا کھوج لگانے لگا تو کمرے کے باہر برآمدے میں سب سلیپنگ بیگ لے کر ”سوئے موئے“ پڑے تھے۔ ان کے اٹھنے پر پوچھا کہ آپ لوگ ادھر کیوں سوئے تھے تو کہنے لگے کہ باہر کمرے سے زیادہ خوشگوار موسم تھا۔ ویسے پچھلی رات میں اندھیرے کی وجہ سے ہمیں پتہ نہیں چلا تھا مگر ایک اہم چیز بدل چکی تھی، وہ یہ کہ پہاڑوں سے سبزہ غائب تھا اور پہاڑ ایک عجب منظر پیش کر رہے تھے۔

ثمر نالہ دریائے سندھ میں گرتے ہوئے

ثمرنالہ میں جس ہوٹل پر ہم ٹھہرے اس کی ایک دیوار سڑک کے کنارے تھی تو دوسری دیوار کی بنیاد نالے میں رکھی گئی تھی بلکہ ہوٹل کے نیچے سے پانی اتنی تیزی سے گزر رہا تھا کہ خوف آتا تھا۔ یہاں پر بجلی واپڈا یا کسی دوسرے محکمے کی نہیں تھی بلکہ مقامی لوگوں نے ڈینمو نالے کے پانی سے چلا رکھی تھی اور دن میں بھی بلب جل رہے تھے۔ جنہیں دیکھ کر مجھے ثمرنالے والوں پر رشک آ رہا تھا۔ ابھی ہم ہوٹل کے آس پاس ہی تھے کہ غلام عباس ثمرنالہ میں لگے ہوئے جنریٹر اور ان کی کارکردگی بھی چیک کر آیا۔

تین درویش مناظر سے لطف اندوز ہوتے ہوئے

میں، سلیم، عباس اور عبدالستار تھوڑی دیر کے لئے دریائے سندھ کے کنارے بیٹھے اور گپ شپ کی۔ اتنے میں باقی دوست بھی تیار ہو گئے، پھر سب نے مل کر ناشتہ کیا۔ شروع میں آپ کو ایک بات بتانا بھول گیا تھا وہ یہ کہ ہمارے ساتھ ایک کچن کِٹ بھی تھی جو کہ سلیم نے تیار کی تھی۔ ثمر نالہ میں پہلی دفعہ ہم نے اس کا استعمال کیا۔ چائے خود بنائی اور یہ قربانی غلام عباس نے دی۔ خیر ناشتہ کیا، تھوڑی سی تصویریں بنائیں اور پھر وہی ہوا جس کا ڈر تھا یعنی مزید سفر شروع۔۔۔

جاری ہے۔۔۔ملتی جلتی تحاریر:-     • دریائے سندھ، یویی پُل اور بشام – پربت کے دامن میں     • عظیم شاہراہ پر سفر – پربت کے دامن میں     • ابتدائیہ – پربت کے دامن میں     • سفر کی شروعات – پربت کے دامن میں     • میں نے انگلی سے زمین گھما دی